Siglir tar il cuntegn

Header

cuntegn

MTB – campiunadi svizzer Vital Albin gudogna argient

Jolanda Neff e Filippo Colombo èn ils emprims campiuns svizzers en la disciplina da mountainbike «Short Race». Il Grischun Vital Albin ha manchentà be per pauc la medaglia dad aur ed è vegnì sin il segund plaz. Albin ha pers piz a cup il sprint final encunter l'indigen Colombo.

Tar la cursa dals umens d'elita ha cumbattì per la victoria fin la davosa runda ina gruppa dad otg. Il Tessinais Filippo Colombo ha lura augmentà il tempo durant la segund davosa runda e lantschà in lung sprint final. Sulet il Grischun Vital Albin – che ha cumenzà la cursa plitost mal – ha pudì tener pitg cun Colombo fin il davos meter. En il sprint final è Albin vegnì fitg datiers da la victoria, ha lura dentant stuì sa cuntentar cun la medaglia d'argient. Igl è l'emprima medaglia en la categoria d'elita per l'atlet grischun.

Bronz gudogna Andri Frischknecht. Nino Schurter e Mathias Flückiger n'han betg fatg part a la cursa da short track a Lugano.

Neff gudogna aur tar las dunnas

Tar las dunnas ha la campiunessa olimpica Jolanda Neff gudagnà il «Short Race» al campiunadi svizzer da mountainbike a Lugano. En in sprint da trais ha ella battì Linda Indergand che gudogna argient e Sina Frei che gudogna bronz.

RTR novitads 18:00

Artitgels legids il pli savens