Alessandra Keller è stada ditg sin in plaz da podest. Sin las davosas duas, trais rundas ha la mountainbikera dal chantun Sutsilvania dentant stuì laschar scappar il duo cun l’Ollandaisa Puck Pieterse e cun l’Austria Mona Mitterwallner ch’han la finala cumbattì per bronz. Pieterse ha gudagnà quest cumbat. A Keller han 56 secundas mancà sin il podest.
Nagina schanza per Neff
Jolanda Neff, avant in onn a Les Gets anc segunda, è vegnida a Glentress Forest en il sid dad Edinburgh be 9avla cun in retard da 4:22 minutas. Neff è gia curt suenter la partenza crudada lunsch enavos ed ha uschia gia baud stuì sutterrar il siemi d’ina ulteriura medaglia a campiunadis mundials. Betg dal tut tanschì per in plaz sut las top 10 hai per Nicole Koller e Ramona Forchini. Ellas han terminà la cursa sin plaz 11 e 12. Steffi Häberlin è vegnida 17avla, Linda Indergand 19avla e Sina Frei 30avla.
Pauline Ferrand-Prévot ina classa per sa sezza
La «grande dame» dal mountainbike, Pauline Ferrand-Prévot, ha pudì defender a moda suverana il titel da campiunessa mundiala. La Franzosa da 31 onns ha gia baud pudì sa distanziar da l’entira concurrenza ed er pudì augmentar da runda tar runda ses avantatg. En l’arrivada ha ella triumfà cun in avantatg da 1:14 minutas sin sia cumpatriota Loana Lecomte ch’è stada quasi durant l’entira cursa sin quest segund plaz.
Per Pauline Ferrand-Prévot èsi gia il 5avel titel da campiunessa mundiala en la cursa roiala da cross-country suenter il 2015, 2019, 2020 e 2022. Ella batta uschia il record da la Norvegiaisa Gunn-Rita Dahle ch’ha gudagnà quatter giadas quest titel. E Ferrand-Prévot veva er gia gudagnà a Glasgow aur en la cursa da short-track.
