Il Grischun Nino Schurter ha pers 13 secundas en questa cursa da short track e stuì sa cuntentar cun il 9avel plaz. Ina buna prestaziun ha er Filippo Colombo mussà. Il Tessinais ch’ha dà ses comeback suenter ina blessura è vegnì 15avel. Reto Indergand è plinavant vegnì 26avel.
Il grond victur è dentant Mathias Flückiger ch’ha grazia a questa victoria er augmentà l’avantatg a la testa dal classament general. Betg a la partenza è stà l’Ollandais Mathieu van der Poel ch’è il mument al Tour de France, e quai gia durant pliras etappas en il maillot jaune.
Svizras persvadan en il short track
En la cursa da short track da las dunnas d’elita è la Svizra Sina Frei vegnida segunda ed ha uschia egualisà ses meglier resultat en ina cursa da la cuppa mundiala. Frei ha pers be 4 secundas sin la victura, l’actuala campiunessa mundiala Pauline Ferrand-Prévot. La Franzosa ha procurà per l’attatga decisiva sin la davosa runda. Cumplettà il podest sco terza cun in retard da 13 secundas ha la Svedaisa Jenny Rissveds.
Manchentà be per pauc in plaz da podest han las duas svizras Linda Indergand ed Alessandra Keller ch’èn classadas sin plazza 4 e 5 ed uschia procurà che gest trais svizras èn classadas sut las top 5. Plinavant è Nicole Koller vegnida 20avla. Betg a la partenza è stada Jolanda Neff.
Nagina schanza ha gì la Franzosa Loana Lecomte. La gronda dominatura da la stagiun che maina er il classament general ha stuì sa cuntentar cun il 12avel plaz.
I spetga l'emprova generala per Tokyo
Las cursas roialas da cross country che valan er gist sco l’emprova generala per la cursa olimpica a Tokyo stattan sin il program questa dumengia. Las dunnas d’elita partan a las 12:20 uras, ils umens d’elita cun Nino Schurter a las 14:50 uras.