Nino Schurter na vegn er cun la 11avla emprova betg d'egualisar il record dal Franzos Julien Absalon da las 33 victorias en la cuppa mundiala. Il mountainbiker oriund da Tersnaus è vegnì quart (+34 sec.) en l'ultima cursa da la cuppa mundiala en questa stagiun a Snowshoe en ils Stadis Unids. Suenter ch'el era ditg a la testa ha l'actual campiun mundial gì in plat en l'ultima runda, paucs meters avant l'arrivada.
Gudagnà la cursa ha la finala l'American Christopher Blevins. Igl è sia emprima victoria insumma en ina cursa da la cuppa mundiala da cross country. Il campiun mundial da short track a Val di Sole a triumfà avant il Rumen Vlad Dascalu (+9 sec.) ed il Tschec Ondrej Cink (+20 sec.).
Er Mathias Flückiger cun defect
Mathias Flückiger, il vice-campiun olimpic ha stuì sa cuntentar cun il plaz 16. Il Bernais ha gì in defect gia en l'emprima runda e n'ha silsuenter gì nagina schanza da cumbatter per in plaz da podest, quai ch'era reussì fin ussa en mintga cursa da la cuppa mundiala en questa stagiun. Gia avant la cursa eri però cler ch'il Svizzer gudogna il classament general, quai per l'emprima giada en sia carriera. El è uschia il quart svizzer suenter Thomas Frischknecht (3x), Christoph Sauser (2x) e Nino Schurter (7x) ch'astga sa numnar il meglier mountainbiker da la cuppa mundiala durant in'entira stagiun.
Vital Albin cun dus plats
Cun Reto Indergand sco 19avel ed Andri Frischknecht sco 20avel han anc dus ulteriurs svizzers terminà la stagiun da la cuppa mundiala sut ils top 20. Il segund grischun a la partenza, Vital Albin, ha terminà la cursa a Snowshoe sco 31avel cun in retard da bun set minutas. Il mountainbiker da Tersnaus è vegnì franà da dus plats ed uschia manchentà in plaz sut ils top 30. Stuì dar si la cursa ha Filippo Colombo ch'era vegnì terz en il short track ed ha uschia astgà parter da l'emprima retscha. Ma er il Tessinais è vegnì franà d'in defect, el ha stgarpà la chadaina, e n'ha silsuenter gì nagina schanza pli.
Classament general da la cuppa mundiala (6/6):
- 1. Mathias Flückiger, Svizra, 1573 puncts
- 2. Victor Koretzky, Frantscha, 1310 puncts
- 3. Ondrej Cink, Tschechia, 1309 puncts
- 4. Nino Schurter, Svizra, 1182 puncts
Er naginas svizras sin il podest
Er en la cursa da cross country da las dunnas n'hai betg tanschì per in plaz da podest per las Svizras. Sina Frei ha dentant be per pauc manchentà sia emprima plazza da podest en ina cursa da la cuppa mundiala. La vice-campiunessa olimpica e campiunessa mundiala da short track è sco meglra svizra vegnida quarta (+2:10 min.). La Turitgaisa para d'avair abunà questa plazza en la cuppa mundiala. Frei è numnadamain uss gia vegnida quatter giadas quarta en questa stagiun.
Ina buna prestaziun ha er Linda Indergand mussà. La mountainbikera dal chantun Uri è vegnida 7avla (+3:19 min.). La campiunessa olimpica Jolanda Neff ha perencunter stuì sa cuntentar cun plazza 9 (+4:08 min.). Nicole Koller è plinavant vegnida 14avla (+6:07 min.) ed Alessandra Keller 23avla (+11:58 min.).
Evie Richards ina classa per sa sezza
Gudagnà l'ultima cursa da la stagiun ha la campiunessa mundiala Evie Richards da la Gronda Britannia, quai a moda suverana. Segunda è vegnida l'Australiana Rebecca McConnell cun in retard da 1:31 minutas, terza l'Ollandaisa Anne Tauber cun in retard da 1:54 minutas.
Classament general da la cuppa mundiala (6/6):
- 1. Loana Lecomte, Frantscha, 1550 puncts
- 2. Evie Richards, Gronda Britannia, 1310 puncts
- 3. Jenny Rissveds, Svezia, 1275 puncts
- 5. Sina Frei, Svizra, 1100 puncts
- 6. Linda Indergand, Svizra, 1018 puncts
