Cuira ha fatg in ulteriur pass, per realisar sia finamira da daventar campiun da la MyHockey League. Cun gudagnar senza problems cunter l'EHC Thun il playoff mezfinal – stattan ils Grischuns uss en il final. Cun tgi che Cuira sa mesira là, n'è anc betg decidì. Suenter trais partidas da la seria best-of-5 maina Seewen cun 2:1 cunter Huttwil.
Terza partida, e terza victoria per l'EHC Cuira cunter Thun. A chasa han ils Grischuns gudagnà cun 5:2. L'emprim gol è crudà en la 14avla minuta – e suenter 54 minutas manava Cuira cleramain cun 5:0. Lura ha Thun an pudì marcar dus gols al resultat final.
Survista playoff mezfinals
Era ordaifer senza macla
Cumenzà ha la segunda partida dal playoff mezfinal il mardi, tranter Thun e Cuira, senza ch'i dettia gols. Pir en la 24avla minuta ha Cuira marcà l'emprima giada. E var duas minutas pli tard augmentà al 2:0. Al cumenzament dal davos terz ha Cuira lura gist sajettà il terz gol. En la 54avla minuta han ils Grischuns lura nizzegià ina situaziun cun in giugader dapli sin il glatsch – e sajettà il gol a la victoria da 4:0.
Victoria a chasa
La sonda aveva l'EHC Cuira gia cumenzà bain ses mezfinal. En l'emprima partida da la seria best-of-5 ha Cuira gudagnà cun 2:0 a chasa cunter l'EHC Thun (0:0 | 1:0 | 1:0). Era sche la promoziun en la liga pli auta è gia realitad, vai ussa er als da Cuira anc per il campiunadi da la MyHockey League. E là è la finamira da l'EHC Cuira cleramain da vegnir campiun. «Far il pass en la liga pli auta senza daventar campiun da la MHL, fiss in pau curius», ha manegià il president ad interim Carmine Di Nardo en l'intervista cun RTR.
Adattà al tema
Il club da hockey da Cuira fa il pass da la MyHockey League si en la Swiss League. Grazia ad ina victoria da l'entschatta mars è l'EHC Cuira suenter 16 onns puspè enavos en la segund auta liga dal hockey svizzer, la Swiss League.
