Siglir tar il cuntegn

Header

cuntegn

MySports League Arosa perda emprima partida da playoff cun 0:7 cunter Huttwil

Huttwil – Arosa 7:0

Il club da hockey dad Arosa perda cleramain l'emprima partida dals quartfinals dal playoff cunter Huttwil. Ordaifer perdan ils Grischuns cun 0:7. Gia en l'emprima minuta ha Arosa incassà l'emprim gol, e suenter 34 minutas eran ils Grischuns gia cun quatter gols en retard. Ed ils da Huttwil han cuntinuà a marcar gol suenter gol – fin al resultat final e brutal da 7:0.

En la seria da best-of-5 statti actualmain 1:0 per Huttwil. La proxima partida en ils playoffs da las duas squadras ha lieu mardi ad Arosa.

Düdingen – Cuira 1:5

La squadra da la chapitala grischuna gudogna cun 5:1 cunter Düdingen, il club dal chantun Friburg. Suenter il segund terz stevi anc 2:1. En il davos terz han ils da Cuira dentant fatg squitsch sin il gol dals Friburgais, e sajettà trais gols aifer 7 minutas..

La proxima partida da la runda da relegaziun gioga Cuira proxim mardi cunter Bülach.

1. liga

Il HC Partenz-Signuradi ha era pers la segunda partida da la runda da relegaziun da la 1. liga. Cunter il SC Rheintal resulta per ils dal Partenz ordaifer in 1:4. En l'otgavla minuta aveva Curdin Lampert sajettà Partenz-Signuradi en avantatg, e fin circa la mesadad da la partida è quai restà uschia. Lura ha Rheintal dentant vulvì il gieu, e curt suenter la segunda marcà il terz gol. Curt avant la fin ha Partenz-Signuradi lura incassà il davos gol al 1:4, cura ch'els avevan prendì ora il goli.

En la tabella ha Partenz-Signuradi suenter duas partidas da la runda da relegaziun, gia 4 puncts retard sin plazza dus che muntass da pudair restar en la 1. liga.

RTR novitads 20:00

Artitgels legids il pli savens