Las ballapedistas svizras dovran ina nova trenadra, u in nov trenader. Il trenader actual da la squadra naziunala, Nils Nielsen chala la fin da quest onn. Quai communitgescha la Federaziun svizra da ballape.
I sajan cunzunt raschuns famigliaras ch'hajan manà a questa decisiun. Il trenader da 50 onns aveva surpiglià l'uffizi da trenader naziunal il 2018 da Martina Voss-Tecklenburg. Questa stad ha el manà la squadra naziunala da las dunnas per la segunda giada al campiunadi europeic.
Ulteriura partenza
Cun Nils Nielsen banduna in'ulteriura persuna da renum la Federaziun da ballape svizra en il sectur da las dunnas. Gia l'emna passada aveva la directura Tatjana Haenni annunzià sia demissiun per la fin da l'onn. Ed er Marisa Wunderlin la trenadra assistenta banduna il SFV – ella veglia far plaz per ina nov'entschatta.
Co il SFV vul remplazzar las trais posiziuns centralas enturn Haenni, Nielsen e Wunderlin è anc avert. Tenor il president Dominique Blanc veglia la federaziun far il meglier per tschertgar soluziuns adequatas.