Suenter che l'emprim terz è ì a fin senza gols, ha il gieu survegnì dapli schlantsch en il segund terz. En la 24avla minuta ha tutgà Samuel Walser per ils Friburgais. Sin quai han reagì ils da Tavau ed han sajettà dus gols aifer duas minutas cun Chris Egli (33avla) e Matej Stransky (35avla). E cun il terz gol curt avant la pausa cun Leon Bristedt (39avla) è il HCD ì cun in avantatg da 3:1 en la pausa.
En il terz terz han ils Friburgais però manà il gieu e marcà trais gols ed ils giugadurs dal HCD han stuì acceptar dapli chastis. Uschia ha il HCD pers si'emprima partida da la stagiun cun 3:4.
Ils ulteriurs resultats:
- HC Ambrì-Piotta – SC Rapperswil-Jona Lakers — 5:2
- SC Berna – Lausanne HC — 4:1
- SCL Tigers – Genève-Servette HC — 2:1 (s.pr.)
- HC Lugano – EHC Biel-Bienne — 0:3
- EV Zug – EHC Kloten — 3:6
- ZSC Lions – HC Ajoie — 7:3
Josh Holden l'emprima giada trenader principal
Per Josh Holden è ses engaschament tar il Club da Hockey da Tavau ses emprim sco trenader principal d'ina equipa en la National League. Avant ha el dà bleras stagiuns cun il EV Zug. Ed en Svizra Centrala era el trenader assistent sper Dan Tagnes. Da primavaira alura era il temp madir. Il HCD ha preschenta il trenader canadais Josh Holden sco successur da Christian Wohlwend, ch’era vegnì relaschà il schaner.
Nov trenader, novs giugaders esters, e bler giugaders da tschep
La pli gronda midada en vista a la nova stagiun ha quai dà sper il glatsch cun Josh Holden ch’è il nov trenader dal HCD. Sin la nova stagiun ha il Club da hockey da Tavau engaschà ad in giugader ester nov, quai è Kristian Näkyvä. Vitiers vegn era anc Aleksi Peltonen, il figl da la legenda da Lugano, Ville Peltonen. Aleksi Peltonen ha ina licenza svizra e na strapatscha uschia betg il contingent da giugaders esters. Speras emprova il nov trenader Josh Holden dad integrar anc pli ferm agens giuvens giugaders. Betg main che quatter agens juniors sa san profilar en l’emprima equipa dal Club da hockey da Tavau.
