Igl è stà in gieu nua ch’ils dus golis èn stads ils gronds acturs. Gilles Senn tar il HCD e Luca Hollenstein èn omadus atgnamain mo la numera 2, en quest gieu han els dentant mussà tge ch’els san e fatg grev la vita als attatgaders. Um dal gieu è la finala Gilles Senn stà cun 31 paradas per Tavau.
Gieu guliv
En l’emprim terz ha il HCD gì dapli dal gieu e persvas spezialmain defensiv. Offensiv ha l’effizienza mancà per ir en avantatg. Zug ha pir en il segund terz chattà in recept en l’offensiva. Malgrà pliras bunas occasiuns n’ha dentant er il campiun svizzer betg dumagnà il puck en la rait. L’emprim gol è crudà pir paucas secundas avant la secunda pausa. Il Svedais Dennis Rasmussen ha tutgà tar il 1:0 cun in sajet ch’è via dies dal goli da Zug ì en la rait. En l'ultim terz ha Zug empruvà ed empruvà d'egualisar. Sper il ferm goli ha dentant l'entira equipa da Tavau persvas cun gronda disciplina ed in ferm gieu defensiv.
En il quart gieu encunter Zug questa stagiun, èsi stà gia la terza victoria per ils Grischuns. Grazia a la victoria encunter il campiun svizzer resta il HCD vinavant sin plazza 5 da la tabella. La differenza sin il stritg è uss gia tar 8 puncts.
Las ulteriuras partidas
- Ajoie – Bienna 0:3.
- Berna – Fribourg 2:3 suenter sajettar penaltis.
- SCL Tigers – Ambri 2:3.
- ZSC Lions – Losanna 1:3.
- Genevra – Kloten 3:1.
