Cun mo 21 onns ha Nico Gross la schanza da daventar campiun svizzer cun l'EV Zug e quai gest en sia emprima stagiun en la National League. Suenter trais onns tar ils Oshawa Generals en la liga da juniors OHL en l'America dal Nord, ha il giuven da Puntraschigna fatg la stad passada il pass tar Zug.
Emprim titel en l'emprim onn?
En ses emprim onn tar l'EVZ tutga el per gronda part tar l'equipa da tschep. Il temp sin glatsch variescha dentant ferm. Amez la stagiun, cura che l'equipa ha gì bleras blessuras, ha Nico Gross survegnì bler responsabladad. Actualmain, durant ils playoffs, è la rolla dal Engiadinais pli pitschna. Durant ils gieus è el, pil pli, mo paucas minutas sin il glatsch.
Mentalmain èsi magari grev da spetgar e spetgar e tuttenina stoss esser pront
Malgrà ch'el è actualmain durant ils gieus mo sporadicamain sin il glatsch, èsi impurtant dad enconuscher sia rolla en l'equipa. Ed il giuven da 21 onns sa era ch'i va magari spert. Mo in giugader sto sa blessar epi ha el gest ina tut'autra rolla en il cader dal EV Zug.
Nico Gross menziuna ch'il impurtant saja, pil mument, il success da l'equipa e betg ils interess persunals. E perquai cumbatta el, sco part dal EVZ, ch'i gartegia da vegnir campiun svizzer. Per l'equipa da la svizra centrala fissi il segund titel da campiun svizzer suenter il 1998.