Trais giadas ha il Club da hockey da Tavau gia gudagnà en la seria da quartfinal encunter il EV Zug. Il HCD dovra uschia be pli ina partida per far il pass en il quartfinal. Per far quai ha il Club da hockey da Tavau quatter ‘pucks da matsch’. L’emprim la gievgia saira en il quart duel encunter il EV Zug.
La quarta victoria è adina la pli difficila
Quai dian ils hockeyans ch’eran gia en quella situaziun. Gist sch'ins maina ina seria cun trais victorias ed ins ha quatter ‘pucks da matsch’ per far tut cler. L’adversari, il EV Zug, sto en questa situaziun gudagnar, cas cuntrari è la stagiun a fin. Ed exact quella constellaziun è uschè difficila. Sch'ins gudagna ils emprims trais gieus e la quarta victoria è gia quasi realitad, schabegia insatge cun il chau. E precis quai è la schanza per l’equipa che ha be pli ina schanza da betg stuair ir en vacanzas.
Era sch'il EV Zug ha da dar en la quarta partida per restar en vita, èn blers hockeyans da l’opiniun ch'il HCD fa tut cler e decida la seria cun 4:0 victorias. Memia suveran era l’equipa grischuna gia durant l’entira stagiun.
Jau crai che la quarta partida tranter il EV Zug ed il HCD vegn ad esser la davosa da questa seria.
Ed er uss en l’emprima runda dals playoffs ha il HCD persvadì en bleras situaziuns. En l’emprim gieu encunter il EV Zug è il HCD turnà suenter ch’el era cun 1:3 en retard. En il segund gieu n'ha il HCD laschà tiers nagin gol. Ed il terz gieu ha Tavau dominà davent da l’entschatta ed era al principi dal segund terz gia cun 5:0 en avantatg.
Themen in diesem Newsticker
- Tavau cun victoria suverana en il terz gieu
- HCD gudogna segund gieu da playoffs
- Playoff quartfinal – gieu 1: HCD gudogna gist anc cun 4:3
- Tavau en ils playoffs – adversari anc nunenconuschent
- HCD turna da Turitg cun 38avla victoria
- HCD na lascha nagina schanza a Losanna
- Hollenstein blessà – HCD engascha Taponen
- Las HCD Ladies senza recept cunter Ambri – la stagiun è a fin
- Kloten procura per la fin da la seria da victorias dal HCD
- HCD Ladies cumenzan playoff cun terrada
Gudagnà 39 da 52 gieus en qualificaziun
Igl è stà ina qualificaziun datiers a la perfecziun dal Club da Hockey da Tavau. 39 da 52 gieus ha il HCD gudagnà e la concurrenza han els distanzià per 17 e dapli puncts. Durant l’entira qualificaziun n’hai strusch dà muments da flaivlezza tar Tavau. Davent da la bell’entschatta èn els stads da chattar sin plaz 1.
Quasi tut ha funcziunà
Durant questa qualificaziun na datti betg bler da crititgar tar il HCD. En fitg blers aspects han els persvas. Da menziunar èn spezialmain ils giugaders esters enturn Matej Stransky e Filip Zadina ch’èn stads immens dominants. Ed in grond pass enavant ha er la segunda garda fatg. Per exempel il defensur engiadinais Davyd Barandun che ha durant l'entira stagiun dà fitg constant, u er Yanick Frehner da Favugn che ha cun ses 12 gols sajettà tants gols sco anc mai.
Ussa vai per il titel
Per il HCD quinta suenter questa qualificaziun mo il titel da campiun svizzer. Tut auter fiss ina gronda trumpada per l'equipa da Josh Holden. Ma cler, playoffs èn adina insatge auter, e qua èsi impurtant ch'il HCD vegn da mantegnair questa levezza ch'i han mussà durant la qualificaziun, ed il medem mument d'agiuntar ina tscherta agressivitad durant fasas pli grevas ch'i dat en ils playoffs. E sch'i vegnan da cumbinar quai, è la schanza buna ch'i dat il 32avel titel da campiun svizzer per Tavau.
Ils ulteriurs playoffs èn
- Friburg-Gottéron – Rapperswil-Jona Lakers
- Genevra Servette – Losanna
- ZSC Lions – Lugano