Kloten, Zug, Langnau ed uss era Ajoie. Il HCD ha festivà sia quarta victoria en seria. Suenter ch’il campiunad aveva cumenzà cun trais terradas suenter sajettar penaltis, ha Tavau chattà la via vers il success en ils ultims gieus.
Persvas offensiv sco era defensiv
En l’emprim terz ha Tavau cumenzà cun in fitg aut tempo e smatgà ils osps dal chantun Giura davent da l’emprima minuta en la defensiva. Leon Bristedt e Dennis Rasmussen han lura era sajettà en avantatg il HCD cun 2:0. Curt avant l’emprima pausa ha Ajoie dentant pudì scursanir sin 2:1 tras il Slovac Martin Bakos.
En il segund terz n’è l’intensitad betg pli stada medem auta. Tuttina han Chris Egli e Marc Wieser auzà il resultat sin 4:1. Dad Ajoie è vegnì offensiv fitg pauc. Sulettamain suenter in sbagl en la defensiun da Tavau, ha in attatgader dals osps tutgà la latta.
En l’ultim terz ha il HCD controllà il gieu. En il powerplay è perfin gartegià il 5:1 a Valentin Nussbaumer. Ils Grischuns han anc gì ulteriuras occasiuns da sajettar ulteriurs gols. Dad Ajoie è offensiv vegnì fitg pauc. La fin finala era pervia da la mancanza da qualitad.
Il Club da Hockey da Tavau dastga esser pli che mo cuntent cun il cumenzament da la stagiun 2022/2023. Suenter set gieus n’hai anc adina betg dà ina terrada suenter 60 minutas per l’equipa da Christian Wohlwend. En la tabella è il HCD da nov sin plaz 3.
Las ulteriuras partidas
- Ambri gudogna cunter ils Lakers cun 4:3 suenter prolungaziun.
- Bienna perda cunter Lugano cun 0:3.
- Friburg perda cunter ils SCL Tigers cun 1:2 suenter prolungaziun.
- Kloten perda cunter Zug cun 1:5.
- Losanna perda cunter Genevracun 1:5.
