10-10-2024
Tavau – Berna 4:3 suenter penaltis
Il gieu è stà tensiv da l'entschatta enfin la fin. Durant il temp regular han omaduas equipas pudì marcar trais gols uschia ch'i ha duvrà ina prolungaziun. Ma era quella n'ha purtà nagina decisiun. E gea, er il shootout è stà tensiv – e lung. Igl ha duvrà ils 14 sajetts enfin che Matej Stransky ha sajettà il gol decisiv. Uschia avanza il HCD en la tabella dal 11avel sin il novavel plaz.
06-10-2024
Tavau – ZSC Lions 2:3
A chasa na po il HCD betg nizzegiar il slantscha da la victoria da la sonda. Encunter ils ZSC Lions datti ina sconfitta da 2:3. Per ils Turitgais è quei l'otgavla victoria en il novavel gieu ed els mainan la tabella cun 20 puncts. Tavau ha uschia gia pers la tschintgavla giada en questa stagiun ed è lunsch enavos sin plazza 11 da la tabella.
Ils ulterieurs gieus:
- Lugano – Rapperswil-Jona Lakers 3:1
05-10-2024
Fribourg-Gottéron – Tavau 1:4
Tavau vegn plaunsieu sin turas. Suenter la sconfitta cunter Ambri-Piotta realiseschan ils Grischuns ina grondiusa victoria da 4:1 ordaifer cunter Fribourg-Gottéron. Cun 12 puncts en otg gieus è il HCD uschia sin plazza 10 da la tabella. Cun ina victoria en il proxim gieu pudessan ils Grischuns avanzar lunsch enavant.
Ils ulteriurs gieus:
- Kloten – Genevra-Servette 2:5
- SCL Tigers – Biel-Bienne 4:1
- ZSC Lions – Lausanne 6:3
- Zug – Berna 4:2
01-10-2024
Ambri-Piotta – Tavau 2:1
Suenter prolungaziun ha l'equipa da Tavau pers cunter Ambri cun 2:1.
Ils ulteriurs gieus:
- Fribourg-Gottéron – Genevra-Servette 2:3
- Kloten – Zug 4:3
- SCL Tigers – Lugano 2:1 suenter prolungaziun
- Losanna – Bienna 2:1 suenter sajettar penaltis
- Ajoie – Berna 0:5
- ZSC Lions – Rapperswil-Jona Lakers 4:3 suenter sajettar penaltis
29-09-2024
Il HCD ha suenter sia victoria la sonda cunter Zug era la dumengia pudì festivar ina victoria – quai a chasa cunter ils Rapperswil-Jona Lakers. Suenter prolungaziun ha l'equipa da Tavau gudagnà cun 4:3. En la tabella resta il HCD cun 8 puncts sin plazza 11.
28-09-2024
EV Zug – HCD 2:6
Il HCD ha reagì sin sia sconfitta da 0:7 cunter Langnau e gudagnà a Zug cun 6:2. Malgrà in retard suenter 14 secundas han ils Grischuns pudì festivar lur emprima victoria ordaifer questa stagiun. En la tabella ha Tavau uschia fatg bun ina plazza ed è da nov sin plazza 11. Zug è crudà da plazza 4 sin plazza 6.
Ils ulteriurs gieus:
- Berna – Ambri-Piotta 4:0
- Bienna – Genevra-Servette 0:4
- Fribourg-Gottéron – ZSC Lions 2:0
- Rapperswil-Jona Lakers – Losanna 2:3 suenter sajettar penaltis
- Lugano – Kloten 4:2
- SCL Tigers – Ajoie 4:1
24-09-2024
SCL Tigers – HCD 7:0
Davent dal cumenzament èn ils da Tavau stads sut squitsch – e suenter 4 minutas eran els gia cun 0:2 enavos. Ed ils SCL Tigers han pudì augmentar cuntinuadamain il resultat. Vitiers hai dà en la 28avla minuta in chasti disciplinar per il rest dal gieu per Andres Ambühl, pervi d'in check cunter il chau. Uschia è Tavau da nov sin il terz davos plaz cun 3 puncts.
Ils ulteriurs gieus da questa saira
- Kloten – Losanna 3:1
- Lakers – Ajoie 6:2
- Lugano – Berna 6:4
- ZSC Lions – Genevra 2:1 suenter prolungaziun
- Zug – Ambri-Piotta 2:3
- Friburg – Bienna 2:3 suenter sajettar penaltis
21-09-2024
Tavau – Genevra Servette 3:2 s.p.
Igl è stà in gieu stretg. Tavau è ì en avantatg anc en l'emprim terz. Genevra ha dentant egualisà ed è ì en avantatg. Uschia ha Tavau stuì currer suenter in detg temp. En la 53avla minuta ha Zadina lura pudì egualisar. Il gol da victoria ha lura Honka sajettà en la prolungaziun.
Ils ulteriurs gieus da questa saira
- Ambri-Piotta – Kloten 3:2 (suenter sajettar penaltis)
- Berna – ZSC Lions 2:3 (suenter sajettar penaltis)
- Biel-Bienne – Ajoie 4:1
- Fribourg-Gottéron – Rapperswil-Jona Lakers 1:2 s.p.
- Lausanne – Lugano 2:4
- Zug – SCL Tigers 6:2
19-09-2024
Lugano – Tavau 4:2
Il HCD turna senza puncts dal viadi en il Tessin. Cunter il HC Lugano hai dà la segunda terrada da la stagiun. Suenter il 2:3 cunter Kloten, ha il club da hockey da Tavau da magunar ina sconfitta da 2:4. Per ils Tessinais è quai l'emprima victoria da la stagiun.
In gieu tut spezial è questa partida tuttina stada per Andres Ambühl, malgrà la terrada. L'attatgader da Tavau ha giugà cunter Lugano ses 1043avel gieu en la National League – in record. Tants gieus sco il Grischun da 41 onns n'ha anc nagin auter giugader da hockey dà en la pli auta liga da hockey svizra. Fin ussa aveva Beat Gerber quest record.
17-09-2024
Tavau – Kloten 2:3
Il gieu n'ha betg cumenzà optimal per ils da Tavau. En l'otgavla minuta è Kloten ì en avantatg tras in gol da Rafael Meier. Fin l'emprima pausa è il resultat restà 0:1. En il segund terz ha Adam Tambellini lura pudì egualisar per il HCD. Fin curt avant la fin è il gieu lura stà tar 1:1. Ma en la 59avla minuta ha Reto Schäppi fatg il gol al 1:2 per Kloten. Sco davosa emprova ha il goli da Tavau bandunà la plazza da gieu – e Simon Ryfors ha pudì egualisar 36 secundas avant la fin dal gieu. La finala ha il shootout decidì a favur da Kloten.
Ils ulteriurs gieus da questa saira
- HC Ambri-Piotta – SC Rapperswil-Jona Lakers 3:4 (suenter sajettar penaltis)
- EHC Biel-Bienne – ZSC Lions 1:3
- Fribourg-Gottéron – HC Ajoie 4:1
- Lausanne HC – Genève-Servette HC 2:1
- EV Zug – HC Lugano 3:2
Prevista
Il club da hockey da Tavau parta en sia segunda stagiun cun il trenader Josh Holden a la banda. L’anteriur giugader dal EV Zug che vegniva odià dals fans dal Club da hockey da Tavau è arrivà en il Grischun. Holden sper il glatsch è ina autra persuna che Holden sin il glatsch. Uss è el motivatur, communicatur, scolast, e psicolog per l’entira squadra. Josh Holden sa senta bain en questa nova rolla. Ed il HCD ha puspè success. La stagiun passada ha la squadra grischuna terminà la qualificaziun sin plazza sis ed è sa qualifitgada directamain per ils playoffs. E suenter blers onns ha il HCD era puspè ina giada gudagnà la Cuppa Spengler.
Novs giugaders esters, dentant er blers grischuns
En vista a la nova stagiun ha il HCD stuì integrar inqual nov giugader. Gest quatter giugaders esters da l’exteriur èn novs tar il Club da hockey da Tavau. Da Rögle en Svezia vegnan il Canadais Adam Tambellini ed il svedais Simon Ryfors. Dal SC Berna il defensur Julius Honka ed il pli spanegià pon ins esser sin las prestaziuns da Filip Zadina da la Tschechia. L’attatgader ha dà sis stagiuns en la NHL tar ils Detroit Red Wings e tar ils San Jose Sharks. El ha pia la classa dad in giugader da la meglra liga da hockey dal mund.
Fracziun grischuna è creschida
Consequentamain vul il HCD er puspè metter sin agens giugaders giuvens e sin giugaders grischuns. Uschia ha il campiun da record pudì engaschar Tino Kessler. Suenter che quel aveva gia dà intginas stagiuns en il dress dal Club da hockey da Tavau è el madirà a Bienna tar in giugader da tschep. Kessler turna en sia patria. E lura vegn era anc il defensur engiadinais Nico Gross a Tavau. El ha dà las ultimas quatter stagiuns a Zug ed ha gudagnà cun il EVZ duas giadas il titel da campiun svizzer. E per finir è era il segund goli dal HCD in Grischun. Luca Hollenstein è era vegnì dal EV Zug a Tavau, el è oriundamain da Domat.
