Siglir tar il cuntegn

Header

cuntegn

National League Tavau batta il leader Servette

En in gieu guliv gudogna il HCD encunter Genevra-Servette cun 2:1 suenter prolungaziun. Il defensur Dominik Egli sajetta il gol decisiv.

Las duas equipas han duvrà intginas minutas avant ch’i han propi chattà la via en il gieu. En las ultimas minutas avant l’emprima pausa ha Tavau sco er Genevra dentant gì pliras bunas occasiuns dad ir en avantatg. Spezialmain en questa fasa èsi stà in gieu sin aut nivel.

Ils fans en il stadion a Tavau, tranter quels era ina gronda delegraziun dal parlament grischun, han dentant stuì spetgar fin paucas secundas avant la fin dal segund terz. Suenter in sbagl en la defensiun da Genevra ha Matej Stransky sajettà en avantatg ils Grischuns.

En l’ultim terz è la reacziun dentant stada vehementa dal leader da Genevra. Il Finlandais Valtteri Fulppula ha egualisà en la 44avla minuta. Suenter quest gol èsi stà in vi e nà cun bunas occasiuns sin omaduas varts. Per il HCD ha Matej Stransky gì la pli gronda schanza en la 56avla minuta. Ses sajet direct ha il goli da Genevra-Servette, Gauthier Descloux dentant parà a moda grondiusa.

La decisiun è crudada suenter 60 secundas en la prolungaziun. En powerplay ha Dominik Egli sajettà Tavau tar la victoria.

Tabella hockey liga naziunala

Avrir la box Serrar la box

Link tar Federaziun da hockey

RTR novitads 20:00

Artitgels legids il pli savens