La differenza ha la Svizra gia fatg en l'emprima mesadad. Bain èn omaduas equipas vegnidas bain en la partida – gist en las emprimas 20 minutas han ils Tschecs giu duas bunas schanzas. Silsuenter èn ils Svizzers alura vegnids pli ferms e Remo Freuler ha sajettà il 1:0 suenter ina flanca da Xherdan Shaqiri. Sulettamain ina minuta pli tard ha Breel Embolo gia pudì realisar il 2:0. Ils Tschecs n'han però betg laschà suenter e Patrick Schick ha fatg anc avant pausa il 2:1.
En la segunda mesadad avessan ils Tschecs alura schizunt giu la schanza d'egualisar sin il 2:2. Suenter in foul da Nico Elvedi èn ils Tschecs vegnì tar in penalti – quel ha Yann Sommer però parà a moda suverana.
Spagna en il turnier final
En la segunda partida da la gruppa svizra ha la Spagna battì il Portugal cun 1:0. Il sulet gol da la partida ha fatg Alvaro Moratta en la 88avla minuta. Ils Spagnols cumpletteschan pia il final da la Nations League – gia qualifitgads eran la Croazia, l'Italia ed il Pajais Bass.
