En la rangaziun da las naziuns ha la Svizra pers in plaz cumpareglià cun la stagiun avant. Ils Svizzers èn rangads sin plazza 4 davos l’Austria, l’Italia e la Frantscha.
Quest maletg cugliuna dentant: Puncto victorias èn ils Svizzers sa megliurads massivamain. Durant la stagiun 2015/2016 ha la Svizra pudì festivar 12 victorias, 6 entras Lara Gut, 2 entras Wendy Holdener e Beat Feuz ed 1 victoria entras Carlo Janka. Plinavant ha la Svizra gudagnà la concurrenza da las naziuns, il Team Event, al final da skis a San Murezzan. Il 2014/2015 avevan ils Svizzers gudagnà sulet 4 cursas da skis. E tut en tut hai dà la davosa stagiun 31 plazs da podest per Swiss Ski.
3 cullas da cristal
Sper la rucla gronda da cristal da Lara Gut per ses triumf en il classament general da las dunnas èn anc idas duas cullas pitschnas a la Svizra. Lara Gut ha gudagnà la culla da cristal sco meglra skiunza en la disciplina super-g e Wendy Holdener la culla da cristal sco meglra skiunza da la super-cumbinaziun.
Beat Feuz – in fenomen
Per la gronda surpraisa ha Beat Feuz procurà. Il skiunz bernais ha dà pir a las cursas dal Lauberhorn a Wengen ses comeback suenter ina greva blessura vid la tarschola d’achilles. Cun tant sco nagina preparaziun ha Feuz fatg surstà l’entir circus da skis ils davos dus mais. Cun 5 plazs da podest, tranter auter duas victorias al final a San Murezzan ed il segund plaz al classicher, la cursa rapida da Kitzbühel, è Feuz stà ina da las grondas figuras il 2016.
Carlo Janka – triumf a Jeongseon
Persvadì ha dentant er Carlo Janka ch’ha tranter auter gudagnà quest onn ses emprim super-g da la cuppa mundiala. Janka ha triumfà l’entschatta favrer a Jeongseon en la Corea dal Sid sin la pista olimpica dal 2018. Plinavant è il skiunz da Sursaissa vegnì terz en la cursa rapida sin la Streif a Kitzbühel.
Fabienne Suter – 5 giadas segunda
Betg d’emblidar èsi las bunas prestaziuns da Fabienne Suter. Ella ha mussà sia meglra stagiun dapi onns cun 5 plazs da podest. Suter è vegnida 5 giadas segunda ed è uschia er vegnida segunda en la disciplina cursa rapida, quai davos il star american Lindsey Vonn.