Naziunal/Internaziunal - 4 biatletas e biatlets dal Grischun a la cuppa mundiala en Svezia
La proxima fin d’emna vegni serius per ils biatlets svizzers, lura cumenza la nova stagiun cun il punct culminant, ils gieus olimpics il favrer a Pyeongchang en la Corea dal Sid. Las emprimas cursas da la cuppa mundiala èn davent da dumengia proxima ad Östersund en Svezia.
Legenda:
Fin viaden il mars èn las cursas da la cuppa mundiala da biatlon.
Keystone
Swiss Ski ha uss fatg las nominaziuns per questas cursas, ed ha nominà quatter biatletas e biatlets grischuns. Sper las duas soras Selina ed Elisa Gasparin parta era Irene Cadurisch tar las dunnas. Tar ils umens va a la partenza Serafin Wiestner da Trin.
La sora giuvna Aita Gasparin sco era Eligius Tambornino ha Swiss Ski selecziunà per las cursas da la cuppa IBU, las cursas dal segund nivel, a Sjusjoen en la Norvegia.
