L’equipa da Bayern München ha duvrà be 14 minutas per manar il gieu encunter Porto en la dretga direcziun. E suenter 40 minutas era il siemi dals Portugais da cuntanscher la proxima runda cumplettamain sutterrà.
Bayern dat ina lecziun a Porto
Bayern München ha dictà il gieu encunter Porto davent da l’emprima minuta. La gala da l’equipa da Pep Guardiola ha cumenzà cun ina pitga da Robert Lewandowski en la 10avla minuta. En la 14avla minuta sajetta Thiago il 1:0. Jérôme Boateng (22avla minuta) e Lewandowski (27avla minuta) han lura pudì augmentar gia baud al 3:0. Tuts trais giugaders han sajettà lur gols cun il chau. En la 36avla minuta sajetta Thomas Müller il 4:0. Per l’attatgader tudestg da 25 onns èsi stà ses 27avel gol en la Champions League. 5 minutas avant la pausa ha Lewandowski fatg tut cler cun il 5:0.
Pauc spectacul en la segunda mesadad
En la segunda mesadad ha finalmain era Porto tuc ina gia il gol. Jackson Martinez ha pudì scursanir al 1:5 en la 73avla minuta. Curt avant la final ha il spagnol en il tricot da Bayern, il defensur Xabi Alonso sajettà il 6:1 entras in culp liber. Tut en tut èsi stà ina demonstraziun da l’equipa da Pep Guardiola ch’ha stuì desister en il quartfinal da la Champions League sin dus dals gronds stars, il Franzos Franck Ribéry ed l’Ollandais Arjen Robben. Tant Robben sco er Ribéry han persequità questa gala da lur equipa a la tribuna ensemen cun 70’000 fans. Il FC Bayern München cuntanscha cunquai per la quarta giada en seria il mezfinal da la Champions League.
Neymar sajetta Barcelona en il mezfinal
Cuntanschì il mezfinal a moda suverana ha er il FC Barcelona. Ils Catalans han suenter il 3:1 a Paris er battì a chasa Paris St.-Germain. Barça ha gudagnà en il Camp Nou cun 2:0 grazia a dus gols dal star brasilian Neymar.
Il PSG avess duvrà in miracul per anc pudair volver il resultat da chasa (1:3). Dentant sin il pli tard cura che Neymar ha tuc al 1:0 en la 14avla minuta è quest duel stà decidì. En la 34avla minuta sajetta Neymar ses segund gol cun il chau. Er suenter pausa n’ha il PSG pudì mussar nagina reacziun. L’equipa da Laurent Blanc ha trumpà sur l’entir gieu. Er il superstar dals Franzos, il svedais Zlatan Ibrahimovic ch’era anc stà serrà en l’emprim gieu n’ha betg pudì dar impuls positivs.
RR novitads 06.00