Suenter la qualificaziun per ils campiunadis mundials han ils giugaders franc motiv da far festa. Ils fans dentant n’han betg celebrà fitg quest success. La qualificaziun sa chapescha numnadamain prest da sasez. Per ina naziun pitschna sco la Svizra n’è quai dentant betg ina chaussa evidenta. Nagut sa chapescha da sasez, sch’ins mira tge equipas che ston star a chasa, per exempel l’Ollanda.
Er sche la Svizra n’ha betg gì la pli ferma gruppa da qualificaziun, ha ella persvadì la finala. Cun 10 victorias ord 12 gieus ed ina suletta terrada a Lissabon encunter il campiun d’Europa il Portugal ha ella pli che merità dad esser da la partida al proxim grond turnier.
Generaziun dad aur
A Vladimir Petkovic èsi reussì da furmar in’equipa che funcziunescha, in’equipa cun giugaders rutinads e giugaders giuvens. Petkovic ha tranter auter gughegià da betg pli nominar il capitani Gökhan Inler e da dar la schanza a giuvens sco in Manuel Akanji u in Denis Zakaria. Plinavant han blers giugaders sco Granit Xhaka (Arsenal), Xherdan Shaqiri (Stoke City), Ricardo Rodriguez (AC Milan) u Haris Seferovic (Benfica) pudì s’etablir tar gronds clubs en las meglras ligas dal mund e quest giugaders èn ussa en la meglra vegliadetgna da procurar per in exploit als proxims campiunadis mundials.
Dapli sang fraid avant il gol
Cun questa equipa actuala sto la finamira esser da vegnir ina gia pli lunsch che als davos turniers. Vul dir sa qualifitgar per ils quart finals, quai che è franc realistic. Perquai sto l’equipa da Petkovic dentant anc lavurar vid intgins detagls, ina gia vid la davosa consequenza avant il gol. Per avair success ston ins sajettar gols, oravant tut en gieus decisivs ed encunter grondas equipas.
Tut en tut po la Svizra dentant mirar cun optimissem vers il proxim punct culminant, ils campiunadis mundials il 2018 en Russia.
RR actualitad 11:00