Anc 3 victorias mancan a Roger Federer enfin igl 8avel titel a Wimbledon. Cun la terrada da Novak Djokovic en la terza runda è il pli grond adversari betg pli en il turnier. Ma tuttina resta la via tar il titel greva. Per cuntanscher quel, sto Federer batter Marin Cilic e silsuenter probabel anc Milos Raonic ed Andy Murray.
Vid il Croat Marin Cilic n’ha Roger Federer betg bunas regurdientschas. Cunter el veva Federer pers il final agl US Open 2014. Igl è dentant stà la sulet terrada cunter Cilic; 5 giadas ha el battì il Croat. Ma Federer manegia, che Cilic saja anc sa meglierà dapi igl inscunter il 2014.
Jau sun fitg fitg cuntent e na vegn betg euforic, ma hai plaschair da la victoria e ma legrel sin il quartfinal cunter Marin Cilic.
En il mezfinal spetgass tgunsch il Canadais Milos Raonic. Quel ha gì pulit miserias en igl otgavelfinal cunter il Beltg David Goffin. Raonic ha pers ils emprims 2 sets, ha lura dentant anc pudì volver il gieu e gudagnar en 5 sets.
Po Federer enfin il final, lura è in duel cunter il numer 2 dal turnier, Andy Murray, tgunsch pussibel. Sco usità tar il turnier a Wimbledon, ses «turnier da chasa», è il Scot en fitg buna furma.
Il quartfinal da Roger Federer cunter Marin Cilic è mesemna a las 14:00.
RR actualitad