Il campiun svizzer da record, ils Grasshoppers, han uschia reagì sin la crisa sportiva. Per immediat è il club sa separà da ses trenader Fink e da ses schef da sport. Successurs per els na datti anc betg. Ils pensums dal scheftrenader surpiglia ad interim Timo Jankowski, il schef dals juniors, e dal trenader da l'equipa U21 da GC, Patrick Schnarwiler.
La relaschada n'è betg ina surpraisa
La dumengia ha GC pers a chasa cun 1:3 cunter Lucerna, igl è stà l'otgavla terrada en roda. Dapi l'avrigl 2018 è Fink stà il trenader. El ha surpiglià il post da Murat Yakin (avust 2017 - avrigl 2018 trenader da GC). Ad omadus n'èsi betg gartegià da purtar ils resultats giavischads.
Actualmain è GC sin l'ultima plazza da la tabella.
RR novitads 17:30