In'emna suenter sia victoria al maraton da Boston ha il sportist da sutga cun rodas Marcel Hug er triumfà a Londra.
Il Svizzer ha gudagnà cun in temp da 1:35.10. Durant il sprint final è l’atlet sa distatgà da l’Australian Kurt Fearnley e dal Brit David Weir. Per Hug èsi la segunda victoria a Londra suenter il 2014.
Schär sin il podest
Tar las dunnas è medemamain ina Svizra ida sin il podest. Manuela Schär (31) da Lucerena è daventada segunda. Gudagnà ha l'Americana Tatyana McFadden cun in temp da 1:44.14. Wakako Tsuchida dal Giapun cumplettescha il podest. Uschia han las atletas repetì il podest dal maraton a Boston.
RR novitads 15:00 / Sportissimo 17:00