En l’emprim gieu da mezfinal ha Juventus Turin battì a chasa il club spagnol da Real Madrid cun 2:1. Avant il gieu da return è tut avert en quest duel tranter il campiun da seria da l’Italia ed il defensur dal titel en la Champions League.
«Sche nus mussain anc ina giada uschia in gieu sco a chasa, lura vesi ora bain», uschia Stephan Lichtsteiner avant il duel cun Real Madrid. Il defensur ha danovamain da duellar cun il superstar da Real, il portugais Cristiano Ronaldo. Avant in’emna ha Lichtsteiner gì sut controlla il meglier ballapedist dal mund dals davos dus onns. Ins na stoppia dentant betg avair sut controlla sulet Ronaldo, i dettia anc auters gronds stars en il cader da Real sco in Gareth Bale u in Karim Benzema.
Cun Juve han paucs quintà
Cuntanscha Juventus Turin il final da la Champions League fiss quai per blers ina surpraisa damai che Juve n’è betg partì cun bler credit en quest turnier. Tranter auter ha il club talian gì ina midada sin la posiziun da trenader. Dapi il 2014 trenescha Massimiliano Allegri il campiun talian. Allegri po pia festivar gia en sia emprima stagiun a Torina gronds success cun ses nov club.
Numer 1 en la Serie A
En l’Italia è Juventus Turin gia dapi intgins onns la gronda figura. L’equipa da Stephan Lichtsteiner ha gudagnà en questa stagiun per la quarta giada en seria il titel da campiun talian, quai a moda suverana. Plinavant ha Juventus Turin anc la schanza da gudagnar quest onn il triple, sper il titel da campiun pia anc la Champions League e la cuppa taliana.
RR Actualitad la saira, 17:00