L’onn 2003 en la vegliadetgna da gnanc 20 onns ha Marc Gini fatg sias emprimas experientschas en la cuppa mundiala da skis. Baud ha Gini dentant era fatg enconuschientscha cun feridas.
Gia al cumenzament da sia lunga carriera ha Gini stgarpà ils bindels en crusch. Quai emprim grev accident è stà in pau sco in segn d’alarm atras tut la carriera da Gini. Fin l’onn 2011 ha Marc Gini adina puspè stuì cumbatter cun feridas.
Avant tschintg onns era sia situaziun uschè difficila cha Marc Gini ha stuì chalar d'ir cun skis. Pass per pass è il skiunz da Baiva dentant turnà. L’emprim en la cuppa d’Europa e tar cursas da la Fis. La stagiun vargada era Gini lura puspè en il circus da la cuppa mundiala da skis.
Questa stagiun che cumenza per Gini cun il slalom mez da november a Levi, vul il skiunz da prest 32 onns puspè turnar definitivamain en la cuppa mundiala. Era sche quai è per il skiunz da Baiva la pli gronda finamira, siemia Gini er d'ina plazza da partenza tar il campiunadi mundial il favrer 2017 a San Murezzan.
RR sportissimo 17:00