Ils trais umens ch'eran sa qualifitgads per ils quartfinals a Tavau èn tuts crudads or. Sco emprim è Roman Schaad stà londervì. El è dentant vegnì 5avel en sia gruppa. Sco segund èn lura las schanzas stadas a fin per Jovian Hediger ch'è vegnì be quart. Er il terz um en la runda n'ha gì naginas schanzas. El è perfin crudà or, e quai curt suenter il start.
Nadine Fähndrich sin plazza 7
La meglra figura ord vista svizra ha fatg Nadine Fähndrich. Ella è la suletta ch'ha pudì sa qulifitgar per ils mezfinals. La finala è la curridra da 23 onns vgnida 7avla ed ha uschia er dumagnà ils criteris da selecziun per il campiunadi mundial da ski nordic la fin favrer a Seefeld. Per la matadora locala, Laurien Van der Graf è il sprint stà a fin en il quartfinal.
Premiera dumagnada per Wieser
Per Fabiana Wieser èsi stà la premiera en la cuppa mundiala tar las cursas a Tavau. Ad ella han mancà radund 10 fin 11 secundas sin las meglras, la finala è ella vegnida 62avla. Per ella en tuttacas in eveniment. Pudair concurrenzar l'emprima giada cun l'elita mundiala è stà per ella in sentiment grondius.
Dumengia fa Wieser er la cursa da da 10 kilometers a Tavau.
Resultat dal final da dunnas
- 1. Stina Nilsson
- 2. Sophie Caldwell
- 3. Maja Dahlqvist
- 4. Natalia Nepryaeva
- 5. Katja Visnar
- 6. Krista Parmakoski
Resultat dal final dals umens
- 1. Johannes Hoesflot Klaebo
- 2. Federico Pellegrino
- 3. Baptiste Gros
- 4. Lucas Chanavat
- 5. Eirik Bransdal
- 6. Gleb Retivykh
RR Sportissimo 17:00
