Nino Schurter ha gia attatgà en l’emprima da sis rundas. Ensemen cun ses collega d’equipa Lars Forster e Matthias Flückiger è el vegnì da scappar gia baud da la concurrenza. Suenter ch’in defect ha franà Lars Forster èsi vegnì ord in trio be pli in duo a la testa. La finala ha Schurter battì Matthias Flückiger, il leader da la seria Swiss Bike Cup, en il sprint final. Lars Forster ha cuntanschì l’arrivada sco terz cun in retard da 42 secundas.
Trio cun Albin, Spescha e Beeli
Ina buna figura ha er Vital Albin fatg a Soloturn, l’auter mountainbiker da Ternsaus. Albin ch’ha vivì durant quatter onns a Soloturn ha pers bun tschintg minutas sin Nino Schurter ed è vegnì 17avel. Tar ils U23 hai schizunt tanschì da far il pass sin il podest sco terz. Ses collega d’equipa Ursin Spescha da Sevgein ha pers bunamain otg minutas ed è vegnì 27avel. I saja stà brutal, era perquai ch’el haja stuì ir bunamain sis rundas tut sulet. Las davosas rundas sajan mo pli stadas in patir, ha Ursin Spescha manegià en l’arrivada.
Giu discletg gia a la partenza ha Andrin Beeli da Sagogn. In defect tecnic ha franà Beeli strusch che la cursa ha cumenzà. Cun in grond retard da pliras minutas ha Andrin Beeli lura tuttina cumbattì tras il percurs e la finala cuntanschì l’arrivada sco 31avel cun in retard da nov minutas.
Courtney distanziescha Neff
Tar las dunnas ha l’Americana Kate Courtney triumfà cun in avantatg d’ina mesa minuta sin Jolanda Neff. Terza è vegnida Ramona Forchini. Per Courtney èsi stà l’emprima victoria dapi ses pli grond success, il titel da campiunessa mundiala la stad da l’onn passà a Lai.
En in’emna spetga in dals emprims puncts culminants sin ils quatter sursilvans. Lura stat sin il program l’emprima da set cursas da la cuppa mundiala ad Albstadt en Germania. La pli impurtanta cursa spetga lura la fin avust als campiunadis mundials da mountainbike a Monte Sainte-Anne en il Canada.
RR sportissimo 12:00