-
Bild 1 von 11. Nino Schurter n'è betg stà da franar il 2017. El ha dominà la stagiun dad A fin Z. Bildquelle: Keystone.
-
Bild 2 von 11. Roger Federer gudogna per l'otgavla giada il turnier da Wimbledon, munta ses 19avel titel da Grand Slam. Bildquelle: Keystone.
-
Bild 3 von 11. Beat Feuz daventa als campiunadis mundials a San Murezzan campiun mundial en la cursa rapida ed uschia successur da Patrick Küng. Bildquelle: Keystone.
-
Bild 4 von 11. Il SC Berna daventa danovamain campiun svizzer da hockey e resta uschia il numer 1 en Svizra. Bildquelle: Keystone.
-
Bild 5 von 11. Aur ed argient - Per Wendy Holdener èn ils campiunadis mundials da skis a San Murezzan stads in success cumplain. Bildquelle: Keystone.
-
Bild 6 von 11. La naziunala Svizra da ballape gudogna il duel da barrage cunter l'Irlanda dal Nord e sa qualifitgescha per ils campiunadis mundials 2018 en Russia. Bildquelle: Keystone.
-
Bild 7 von 11. Luca Aerni gudogna aur e Mauro Caviezel bronz en la cumbinaziun alpina dals campiunadis mundials a San Murezzan. Bildquelle: Keystone.
-
Bild 8 von 11. Jolanda Neff daventa per l'emprima giada campiunessa mundiala da mountainbike tar l'elita. Bildquelle: Keystone.
-
Bild 9 von 11. A la festa dad Unspunnen vegn il lutgader Curdin Orlik franà pir en la lutga finala da Christian Stucki. Bildquelle: Keystone.
-
Bild 10 von 11. Giulia Steingruber gudogna bronz als campiunadis mundials a Montreal. Bildquelle: Keystone.
-
Bild 11 von 11. Martina Hingis dat adia al sport da tennis, quai sco numer 1 dal mund en il dubel. Bildquelle: Keystone.
Sper Nino Schurter han anc auters sportists svizzers procurà per grond success quest onn, oravant tut Roger Federer. Tar ses comeback il schaner ha Federer gist triumfà a l’Australian Open a Melbourne. Cun ses 8avel titel a Wimbledon, il 19avel titel da Grand Slam, ha Federer rut in ulteriur record. Il sportist svizzer da l’onn ha la finala terminà la stagiun sco numer dus dal mund.
Per gronds success han plinavant er skiunzas e skiunzs svizzers procurà als campiunadis mundials da skis il favrer a San Murezzan. Beat Feuz (cursa rapida), Luca Aerni (cumbinaziun alpina) e Wendy Holdener (cumbinaziun alpina) han schizunt dastgà retschaiver la medaglia dad aur avant ils fans da chasa. Holdener ha plinavant anc gudagnà argient en il slalom ed è uschia stada la skiunza svizra cun il pli grond success a quests campiunadis mundials da chasa. Ulteriuras medaglias hai dà per Mauro Caviezel (bronz cumbinaziun alpina), Michelle Gisin (argient cumbinaziun alpina) e Lara Gut (bronz super-g).
Naginas medaglias hai dentant dà per passlunghistas e passlunghists svizzers als campiunadis mundials da ski nordic a Lahti en Finlanda. Duas giadas hai mancà pauc, tant la staffetta dals umens sco er Nathalie von Siebenthal en il skiatlon han mintgamai stuì sa cuntentar cun il quart plaz. A la fin dals campiunadis è Dario Cologna daventà 7avel en la cursa roiala, ils 50 kilometers.
Cun la fin da l’onn han era intgins sportists dà adia al sport, en emprima lingia Martina Hingis, franc ina da las pli grondas figuras insumma dals davos decennis.
Sa legrar dastgan ils fans da sport en Svizra era sin l'onn 2018. Sper ils gieus olimpics d'enviern il favrer a Pyeongchang en la Corea dal Sid vegni la stad tar in ulteriur punct culminant, ils campiunadis mundials da ballape en Russia, danovamain cun la naziunala Svizra ch'ha pudì sa qualifitgar suenter avair gudagnà il duel da barrage cunter l'Irlanda dal Nord.
RR actualitad