Las blessuras dal skiunz da La Punt èn il fil cotschen tras la carriera dal sportist da 32 onns. Diversas giadas ha el rut ils lioms dal schanugl ed ha gì problems cun il dies. Ils ultims quatter onns è el per exempel stà be 21 giadas a la partenza da la cuppa mundiala.
Jau hai stuì esser sincer cun mai sez, pertge la fidanza n'hai jau betg pli chattà durant ils trenaments sin naiv dals ultims dus mais. Jau hai sentì ch'jau na vegn betg pli dad ir cun il medem sentiment sco pli baud.
Midada tar trenader
Viletta vul dentant tuttina restar fidaivel al sport da skis. El vul uss far midada en il metier da trenader. Co ed en tge furma è anc avert. El haja fatg tras en sia carriera tut ils success e las trumpadas pussaivlas, ha ditg Viletta. Perquai saja el persvadì ch'el pudess ir en bain sin ils skiunzs e las skiunzas.
Ils blers accidents ch'jau hai gì durant mia carriera èn stads negativs per il sport da cursa. En mia professiun futura pudessan quellas experientschas dentant esser ina gronda fermezza.
Ils puncts culminants da sia carriera:
- 2014: medaglia d'aur als gieus olimpics da Sotchi en la cumbinaziun
- 2014: Suenter ses success a Sotchi è Vilettà vegnì elegì dal public sco Grischun da l'onn.
- 2011: Victoria en il super-G a Beaver Creek, il sulet podest da Viletta en sia carriera da la cuppa mundiala
- 2006: L'onn 2006 ha il giuven da La Punt cumenzà sia carriera en la cuppa mundiala.
Ord l'archiv:
Ord l'archiv
RR novitads 16:00
