Il skiunz tudestg Stefan Luitz perda sia suletta victoria en la cuppa mundiala. La FIS ha disqualifitgà il skiunz pervia ch’el haja inhalà oxigen tranter ils dus percurs dal slalom gigant a Beaver Creek ils 2 da december 2018. Il grond profitader da la decisiun è Marcel Hirscher che vala uss sco victur. El po uschia festivar posteriuramain sia 65avla victoria en la cuppa mundiala. Dentant era dus Svizzers profiteschan da la disqualificaziun: Thomas Tumler è segund e Loïc Meillard sa meglierescha sin il quart plaz.
Stefan Luitz ha dentant gia annunzià da far recurs cunter la decisiun da la FIS. Sco proxim sto il Tribunal internaziunal dal sport TAS sa fatschentar cun il cas.
RR novitads 14:00