Wendy Holdener sto vinavant spetgar sin sia emprima victoria en il slalom. Per la novavla giada è sulettamain l'Americana Mikaela Shiffrin stada pli sperta. Terza è vegnida la Slovaca Petra Vlhova. Suenter l'emprim percurs manava Holdener cun in avantatg da 0,28 secundas sin Shiffrin.
Per Shiffrin èsi stà la 8avla victoria da la stagiun en in slalom – la 40avla da la carriera. L'Americana ha uschia egualisà ils records da Janica Kostelic ed Ingemar Stenmark. Kostelic ha gudagnà otg slaloms en la stagiun 2000/01, Stenmark ha gudagnà 40 slaloms en sia carriera.
Aline Danioth è crudada or en il segund percurs. L'Uranaisa era suenter l'emprim percurs sin il 12avel plaz.
Cullas per Shiffrin
Gia dapi in temp era cler che Shiffrin gudognia la culla pitschna en sia disciplina da parada. Damaun ha ella er la schanza da gudagnar la culla pitschna en il slalom gigant – quella dal super-G ed er la culla gronda dal classament general ha ella gia gudagnà.
RR novitads 14:00
