Siglir tar il cuntegn
cuntegn

Naziunal/Internaziunal 12avla victoria per Alex Fiva

Il Grischun Alex Fiva festivescha en la Svezia sia 12avla victoria en la cuppa mundiala dal skicross. Quai rapporta l'agentura da novitads SDA.

Els 4 gist in suenter l'auter.
Legenda: Alex Fiva gudogna il final en la Svezia – avant il Franzos Bastien Midol ed ils dus Austriacs Daniel Traxler ed Adam Kappacher. Keystone

Vinavant bunas prestaziuns svizras en il skicross: Tar ils umens gudogna il Grischun Alex Fiva, tar las dunnas maina la Vadaisa Fanny Smith uss il classament dal campiunadi mundial.

Idre porta fortuna ad Alex Fiva

Alex Fiva gudogna il final en la Svezia avant il Franzos Bastien Midol ed ils dus Austriacs Daniel Traxler ed Adam Kappacher – e gudogna uschia gia la terza giada en roda la cursa ad Idre. Er sias ultimas duas victorias da cuppa mundiala il 2017 e 2018 aveva il Grischun fatg ad Idre.

Duas emnas avant ils campiunadis mundials en ils Stadis Unids sa chattia Fiva en top furma, scriva la SDA. El haja dominà ad Idre tut ils percurs.

Fanny Smith maina uss il classament total da la cuppa mundiala

Tar las dunnas è la Svizra Fanny Smith vegnida en la quarta cursa da la stagiun per la terza giada sin il podest: En in fotofinish vegn ella terza suenter la Canadaisa Marielle Thompson. Gudagnà ha la Tudestga Heidi Zacher.

Ellas trais sin la lingia da l'arrivada.
Legenda: Heidi Zacher gudogna – davos ella il fotofinish tranter Fanny Smith (a dr.) e Marielle Thompson. Keystone

Fanny Smith surpiglia dentant cun sia terza plazza il classament total da la cuppa mundiala da las dunnas.

La dumengia segua anc ina cursa ad Idre avant che tut la cumpagnia da skicross va en l'America dal Nord. La spetga en in'emna la proxima cursa en il Canada.

RR novitads 14:00+