Siglir tar il cuntegn

Header

cuntegn

Naziunal/Internaziunal 1976: Heini Hemmi vegn campiun olimpic

Avant 40 onns han ils skiunzs svizzers procurà per furora als gieus d’enviern ad Innsbruck, oravant tut Heini Hemmi che veva enfin lura anc mai gudagnà ina cursa da la cuppa mundiala. Hemmi ha schizunt procurà per ina sensaziun ils 10 da favrer 1976 cun gudagnar aur olimpic en il slalom gigant.

Il success da Heini Hemmi è praticamain vegnì ord il nagut damai ch’el na valeva betg sco in dals gronds favurits. Mo ad Innsbruck ha Hemmi mussà la cursa da sia vita e battì ses dus gronds contrahents, il Talian Gustav Thöni ed il Svedais Ingemar Stenmark. Per Thöni n’hai insumma dà nagina medaglia. Stenmark, che tegn anc oz il record cun la pli bleras victorias en la cuppa mundiala, ha stuì sa cuntentar cun bronz, anc davos il svizzer Ernst Good. Uschia hai dà en quest slalom gigant ina victoria dubla per la Svizra.

Heini Hemmi «Sturzenegger»

Che Heini Hemmi ha insumma pudì ir a la partenza als gieus olimpics dad Innsbruck n’era insumma betg cler, quai pervia dals resultats. Hemmi aveva savens mussà buns emprims percurs, mo lura crudà enavos en il segund percurs, u perquai ch’el era memia plaun ni ch’el ristgava uschè bler ch’el crudava ora. Sinaquai veva Hemmi er survegnì il surnum «Sturzenegger».

A la fin da la stagiun olimpica dad Innsbruck ha Heini Hemmi finalmain er pudì gudagnar ina gia ina cursa da la cuppa mundiala. La stagiun 1976/77 èn anc trais ulteriuras victorias en sia disciplina da parada, il slalom gigant, vegnidas vitiers, uschia che Hemmi ha er gudagnà en quella stagiun la rucla pitschna da cristal.

Adia cun 30 onns

En la vegliadetgna da 30 onns è Heini Hemmi sa retratg dal sport da prestaziun, quai in zic surprendent. Cunquai ha Hemmi er desistì da la pussaivladad da repeter sia victoria olimpica dad Innsbruck als gieus olimpics il 1980 a Lake Placid. Hemmi, il skiunz dad 1,63 meters che crudava oravant tut si pervia da sia barba, è dentant anc ditg stà fidaivels al sport da skis. Suenter sia carriera ha el vendì durant blers onns material da cursa sco raits da segirtad u pitgas da slalom, ch'han suenter ses onns midà fitg il stil dals skiunzs. Ed oz, 40 onns suenter ses grond triumf ad Innsbruck, ha el anc ina gia midà metier. Per ver ruaus da l’entira truscha ha Heini Hemmi cumenzà ad ir pestga. Oz importa e venda el salmun d’Alasca, quai tar el a chasa, a Churwalden.

RTR/aw