Il podest:
- 1. Dominik Paris (ITA) 1:55,37
- 2. Urs Kryenbühl (SUI) +0,08
- 3. Beat Feuz (SUI) +0,26
Venderdi aveva Kryenbühl gia procurà per ina surpraisa a Bormio. Sin in traject scursanì è el vegnì 13avel ed ha realisà ses meglier resultat da la carriera. Oz lura anc ina giada novas sferas per l'um da Schwyz. Cun il numer da partenza 25 ha el attatgà il leader, Domnik Paris, il victur dal di avant. Tar l'ultim temp intermediar è Kryenbühl anc stà 0,12 secundas davant il Talian. En l'arrivada han lura dentant mancà 0,08 secundas per la victoria.
Suenter il segund plaz en la cursa rapida dal venderdi ha Beat Feuz dumagnà oz sco terz sin il podest. Cun quai è Feuz er en la quarta cursa rapida da la stagiun stà tranter ils emprims 3. Feuz che porta pervi d'in oss rut en il maun ina stgaina vi dal maun, ha pers temp en la part amez.
Paris ha entant cementà ses status sco «retg da Bormio». El ha gudagnà la cursa rapida sin questa pista gia per la quarta giada en roda, la 5avla giada insumma.
Ils ulteriurs Svizzers
- Niels Hintermann +0,88
- Carlo Janka +3,70
Il di è vegnì serrà giu bain da Niels Hintermann che ha mussà ina ferma prestaziun. Il Turitgais è a partir da l'entschatta stà da la partida tar ils svelts ed è vegnì 6avel. Quai è ses meglier resultat d'ina cursa rapida.
Reichelt cun discletg
Suenter 14 skiunz è la cursa vegnida interrutta. Hannes Reichelt è crudà suenter radund 50 secundas viadi ed è sa tschentà en las raits. L'Austriac ch'è stà dasdà durant l'entir temp è vegnì transportà cun helicopter en l'ospital.
RTR sportissimo 17:00