Nino Schurter po festivar sia 30avla victoria da la cuppa mundiala da mountainbike. Tar il final en la Frantscha gudogna il Grischun 12 secundas avant il Talian Gerhard Kerschbaumer. Terz daventa il Franzos Maxime Marotte. La victoria en il classament general aveva Nino Schurter gia segirà avant duas emnas.
Sco segund meglier Svizzer è Mathias Flückiger vegnì sisavel. El aveva triumfà per l'emprima giada avant duas emnas en il Canada.
Jolanda Neff gudogna cuppa mundiala
La mountainbikera Jolanda Neff gudogna a La Bresse en Frantscha il final da la cuppa mundiala e cun quai per la terza giada la victoria en il classament general da la cuppa mundiala. Quel aveva Jolanda Neff gia gudagnà il 2014 e 2015.
La Danaisa Annika Langvad ch'è stada fin l'ultim la gronda concurrenta da Neff per il classament general, ha terminà la cursa da cross country sin plaz 3. Segunda è vegnida la Canadaisa Emily Batty.
RR novitads 15:00