L’enviern 1968 era l’enviern da Dumeng Giovanoli. Aifer d'ina emna aveva il skiunz da Segl gudagnà l’emprim il slalom da Wengen ed alura gist anc il slalom da Kitzbühel. Cun la victoria dals dus classichers ha Dumeng Giovanoli scrit istorgia. Ina istorgia che ha durà 52 onns. Pir uss èsi puspè grategià ad in skiunz svizzer da gudagnar sin il «Ganslernhang» a Kitzbühel. Daniel Yule è stà bun da scriver il proxim chapitel en l’istorgia dal slalom da Kitzbühel.
Wengen e Kitzbühel ILS classichers dal sport da skis
Enturn naginas autras cursas datti tantas istorgias sco enturn las cursas dal Lauberhorn a Wengen e dal Hahnenkamm a Kitzbühel. Victorias, tragedias, dramas, muments da legria – dentant era muments fitg trists fan part da la lunga istorgia enturn ils classichers.
La victoria a Kitzbühel è per mai pli preziusa ch'il titel da campiun mundial.
Dapertut nua che Dumeng Giovanoli è sin pista, sa colliescha ses num cun las victorias dals dus classichers a Wengen ed a Kitzbühel. Perfin la medaglia da bronz tar il campiunadi mundial da skis l’onn 1970 a Val Gardena – na splendura betg uschè ferm sco las duas victorias a Wengen ed a Kitzbühel. Suenter 52 onns ha Dumeng Giovanoli uss a la fin pudì dar vinavant l’onur dad esser il davos skiunz svizzer che ha triumfà a Kitzbühel.
RTR actualitad 17:00