Duas plazzas da podest per la Svizra en la cuppa mundiala dals aerials - l'acrobatica cun skis. A Deer Valley ha Noé Roth gudagnà per la segunda giada en sia carriera ina concurrenza dad aerials, quai cun 3 puncts avantatg sin l'american Justin Schoenefeld. Terz è daventà in ulteriur Svizzer, Pirmin Werner.
Fitg buna prestaziun da Bouvard
Tar las dunnas ha Carol Bouvard cuntanschì cun plazza 4 il meglier resultat da sia carriera. Per ina plazza da podest han mancà ad ella be 2,6 puncts. Gia a l'entschatta da la stagiun è ella siglida a Kuusamo cun plazza 7 en ils top 10.
Gudagnà ha surprendentamain Danielle Scott da l'Australia, sin il segund e terz plaz suandan duas Americanas - Winter Vinecki e Kaila Kuhn.