Siglir tar il cuntegn

Naziunal/Internaziunal Anc betg unfis: Gian Franco Kasper vul restar al timun da la FIS

L’engiadinais Gian Franco Kasper (73) vul restar 4 ulteriurs onns president da la federaziun internaziunala da skis FIS. Quai ha communitgà la FIS la dumengia.

Portrait Kasper.
Legenda: El vul anc ina giada – Gian Franco Kasper la fin d'october a Sölden (A). Keystone

Tar l'inscunter d'atun dal FIS-Council la sonda ha Gian Franco Kasper infurmà la FIS uffizialmain, ch'el candideschia il matg 2018 per in’ulteriura perioda d’uffizi. Actualmain dura la perioda d’uffizi al timun da la FIS quatter onns.

Dapi 19 onns en uffizi ed anc betg unfis

La notizia en il protocol da la sesida da la sonda ad Oberhofen è be curta: «Il president da la FIS Franco Kasper ha infurmà il Council da si’intenziun da sa metter a disposiziun per la re-elecziun al proxim congress da la FIS il matg 2018.»

L’onn 1998 era el vegnì elegì per l’emprima giada sco president da la Federaziun internaziunala da skis FIS. Quella giada sco successur da ses cumpatriot Marc Hodler. Kasper è er commember dal Comité olimpic internaziunal.

51avel congress da la FIS il matg 2018

Il proxim congress da la FIS è il 51avel ed ha lieu a Costa Navarino (GRE). La FIS spetgia passa 1’000 participants. Actualmain hajan las associaziuns naziunalas tramess 65 propostas che hajan da vegnir prendidas en consideraziun, scriva la FIS.

RR novitads 12:00