Para è quai ina relaziun per vita duranta: Dapi 22 onns è Arno del Curto gia trenader dal HCD. 8 giugaders dal cader actual eran lura anc gnanc naschids. En quels 22 onns ha per exempel il club da hockey da Berna engaschà 15 differents trenaders ed il club da ballapè da Sion schizunt passa 50 trenaders.
Avant l'èra da del Curto ha il club da hockey gì 6 campiunadis svizzers e 5 cuppas da Spengler pli pauc sin il conto. Quai èn be intginas cifras impressiunantas per mussar las prestaziuns dad Arno del Curto. Ma la situaziun actuala na vesa betg or uschè grondiusa. Entaifer ils quatter ultims gieus hai dà trais autas sperdidas: 0:7 cunter ils SCL Tigers, 2:5 cunter Friburg e 3:7 cunter Bienna.
Situaziun actuala demussa la tendenza dils davos onns
Ils temps da grond success per il club che tegn il record per campiunadis svizzers (31 giadas) èn bain intgins onns enavos:
Las cifras fan vesaivel, ch'igl è betg mo ina crisa actuala, mabain ch'ils davos onns n'eran betg surchargiads cun success. E sch'ins mira mo sin ils ultims quatter onns, pon ins vesair ina tendenza che fa in zic tema.
I manca in zic dapertut
Mumentan sa chatta il HCD en la rangaziun sut il stritg. Cler, la stagiun è anc giuvna ed igl ha adina puspè dà onns, nua ch'il HCD n'è betg partì optimal en la stagiun. Ma ins pudess manegiar ch'igl haja facturs pli profunds che giogan quest onn ina rolla. D'ina vart n'è la situaziun cun ils golis betg cuntentaivla. Atgnamain aveva il HCD dus golis cun grond talent en las atgnas retschas, ha dentant uss cumprà in goli da l'exteriur.
Ils dus golis svizzers n'èn betg sa sviluppads sco ins ha sperà.
Era vegn la differenza da budget da vart uffiziala menziunada: Il HCD haja in ton pli pauc daners che la concurrenza. E cunquai ch'ins sanescha mumentan la Vaillant Arena, manca 1 milliun per investir en il cader.
En il sport ves'ins adina puspè: Quels cun ils blers daners gudognan ils campiunadis.
Sulettamain envers ina persuna datti en sasez mai critica pli gronda: il trenader Arno del Curto. La gronda part dals fans na po betg s'imaginar lur club preferì senza del Curto. Fissi però betg temp per ina midada davos las bandas, temp per vent frestg?
Ina persuna, duas funcziuns
Specialmain vi da la situaziun da Tavau è segiramain era, che Arno del Curto è sper trenader er schef da sport. Quella rolla dubla n'è betg usitada en il sport professiunal.
Ils ultims 23 onns ha il HCD gì quella rolla dubla. Uss perdain nus intgins gieus e tuts crititgeschan las structuras. Forsa èsi da midar en il futur, dentant mumentan constati uschia.
Sch'il futur vegn ad esser cun u senza Arno del Curto na san ils responsabels betg. En ina crisa stoppian ins ir sur ils cudeschs tar tuttas persunas. Actualmain vesa il president Gaudenz Domenig tuttina nagin motiv da dubitar vi dad Arno del Curto sco trenader u sco schef da sport.
2021 - 100 onns HCD, 65 onns Del Curto
Cun Arno del Curto ha il HCD atgnamain anc plans pli gronds:
Jau vuless il 2021 daventar campiun svizzer cun Arno del Curto ed igl è la finamira, la speranza da festivar ensemen il giubileum da 100 onns.
2021 è uschiglio er anc in onn interessant: Lura vegnan las lavurs da sanaziun da la Vaillant Arena finidas. Ultra da quai vegn Arno del Curto 65 e fiss alura era 25 onns trenader da l'emprima equipa dal HCD. I dat pia intgins indidzis, ch'il HCD na vegn almain fin il 2021 betg a midar trenader.
RR Sportissimo 17:00
