Siglir tar il cuntegn

Naziunal/Internaziunal ARD e ZDF na pon betg emetter da gieus olimpics

Ils emetturs da televisiun tudestgs ARD e ZDF na vegnan betg a pudair emetter live dals gieus olimpics dal 2018 fin il 2024. L'interpresa americana Discovery ed ils dus emetturs n'han betg pudì sa cunvegnir sur dal pretsch per las sublicenzas.

Las dunnas da tennis sa legran als gieus olimpics a Rio.
Legenda: En Germania emetta exclusiv l'emettur Eurosport. Keystone

Discovery aveva segirà surprendentamain ils dretgs per il martgà europeic per 1,3 milliardas francs. Uschia vegn Eurosport l'interpresa affiliada a Discovery ad emetter exclusiv en Germania da las concurrenzas sportivas. Sco pliras medias scrivan duai ARD e ZDF avair proponì da pajar 100 milliuns euros per pudair emetter dals gieus olimpics d’enviern il 2018 a Pyeongchang e dals gieus olimpics il 2020 a Tokio. Discovery vuleva dentant para 150 milliuns euros.

En Svizra emetta la SRG/SSR era ils gieus olimpics live. Ella dispona da las sublicenzas fin il 2020. La SRG/SSR n’ha betg inditgà quant ch’ella ha pajà per ils dretgs d’emetter.

RR novitads 17:30