A Björnen, datiers dad Are, pon turists ed indigens cudeschar turas cun chauns da schlieusa. Ils huskies da Kaj Westerlund fan bunamain mintga di turas cun persunas. Durant l'enviern èn els fitg activs, curran tras la cuntrada.
Temperaturas enturn -15°C sajan idealas per ils chauns. Sch'i vegnia pli chaud hajan els pli gronda bregia da currer. Cunquai ch'i plova actualmain en Svezia e las temperaturas èn tar nulla grads è la naiv greva, perquai han ils chauns actualmain dapli problems da trair las schlieusas tras la cuntrada. Uschiglio pon els per regla currer duas turas da mintgamai duas uras che mainan tras ils guauds e la cuntrada d'enviern en la vischinanza da Björnen. La primavaira suenter tut il strapatsch da la stagiun èn ils 35 chauns da Kaj Westerlund dentant stanchels.
Suenter la stagiun èn ils chauns stanchels sco atlets d'elita. Lura dovran els paus e temp da recreaziun.
Da primavaira enfin l'atun fetschian els paus, mangian e chargian las batterias per la proxima stagiun d'enviern.
Pazienza e spiert positiv
Per savair ir enturn cun tants chauns dovria quai bler pazienza e cunzunt er in spiert positiv dal possessur Kaj Westerlund. Tenor el giaja quai bain cun ils chauns cura ch'era el saja da buna luna. Uschia fetschian ils chauns er in bun job durant las turas, quai che cuntentia era ils giasts.
RR actualitad 07:00