En Svezia èn las pausas da café insatge sontg e vegnan numnadas «Fika». Mintga persuna prenda almain peda ina giada il di per far pausa da café. Uschia era en la Kafferosteri ch'è amez il vitg dad Are. Ir a café saja per ils Svedais e las Svedaisas ina buna chaschun per far ina pausa e tgirar contacts, quai di er Linus Elfvendahl ch'è barista en in dals cafés ad Are. Tar in classic «Fika» tutga in café ed er insatge dultsch – il pli savens è quai in «Kanelbulle». Quai è in paunet dultsch cun chanella.
Inscunter da tuttas sorts
En il café croda en egl che strusch in client banduna il local senza dar ina baterlada. U ch'i vegn discutà davart ils campiunadis mundials da skis, davart l'aura ubain ch'il barista dat cussegls sc'in guid. El è numnadamain naschì e creschì si ad Are e dat bugen cussegls a turists e voluntaris che n'enconuschan betg il lieu. Durant ils campiunadis mundials da skis hajan ins la pussaivladad d'inscuntrar massa glieud – el lavuria spezialmain gugent sch'i giria insatge spezial ad Are.
RR actualitad 07:00