Armon Orlik il newcomer da l'onn

Il lutgader Armon Orlik da Maiavilla è vegnì elegì als Sports Awards a Turitg sco Newcomer da l’onn 2016. Sco sportista e sportist da l'onn èn vegnids elegids la skiunza Lara Gut ed il ciclist Fabian Cancellara.

Laschar ir video «Orlik: «Eine Ehre für mich und den ganzen Schwingsport»»

Orlik: «In’onur per mai e l’entir sport da lutga»

1:16 min, dals 18.12.2016

Armon Orlik ha gudagnà quest’elecziun piz a cup avant la giugadra da tennis Viktoija Golubic e la tiradura Nina Christen.

Il lutgader da 21 onns ha gudagnà quest onn 6 festas da lutga ed ha plinavant cuntanschì la lutga finala a la festa federala ad Estavayer. L'onn da lutga 2016 ha Armon Orlik terminà sco numer 1.

Gut e Cancellara ils sportists da l’onn

Ils sportists da l’onn 2016 sa numnan Fabian Cancellara e Lara Gut. Per Fabian Cancellara èsi gia il segund titel da sportist da l’onn suenter il 2008. Per Lara Gut èsi perencunter ina premiera. Omadus èn vegnids onurads als Sports Awards a Turitg.

Fabian Cancellara ha triumfà questa stad als gieus olimpics a Rio en la cursa da velo cunter l’ura. A la fin da la stagiun ha il ciclist Bernais da 35 onns terminà sia carriera sportiva. L’elecziun sco sportist da l’onn ha Cancellara gudagnà avant il mountainbiker grischun Nino Schurter ch’è vegnì il 2016 campiun mundial e campiun olimpic. Sin il terz plaz è vegnì elegì il giugader da tennis Stan Wawrinka ch’ha tranter auter gudagnà quest onn il US Open.

Lara Gut ha gudagnà l'elecziun avant Giulia Steingruber, . Lara Gut ha gudagnà la stagiun passada il classament general da la cuppa mundiala da skis. Ella è l'emprima skiunza svizra dapi Vreni Schneider avant 21 onns ch'ha uschia gudagnà la rucla gronda da cristal. L’elecziun sco sportista da l’onn ha Lara Gut gudagnà avant la gimnastica Giulia Steingruber e la triatleta Nicola Spirig.

Ulteriurs victurs ...

Sco team da l’onn 2016 èn ils quatter rembladers, Mario Gyr, Simon Niepmann, Simon Schürch e Lucas Tramèr vegnids elegids. Quest quartet ha gudagnà la stad passada aur olimpic a Rio. Trenader da l’onn è Jordanov Zoltan, il trenader da la gimnastica Giulia Steingruber e sco sportist da l’onn cun impediments è Marcel Hug vegnì elegì, quai gia per la 5avla gia. Hug ha tranter auter gudagnà als paralimpics a Rio duas giadas argient ed ina gia aur en cursas cun la sutga da rodas.