Siglir tar il cuntegn

Header

audio
Roger Federer vul ses 7avel titel als ATP Finals.
Or da Sportissimo dals 10.11.2019.
laschar ir. Durada: 03:45 minutas.
cuntegn

ATP Finals a Londra Tut pront per il grond showdown

A Londra cumbattan quest’emna ils actual otg megliers giugaders da tennis dal mund per il davos titel da l’onn als ATP Finals. Per la 17avla giada da la partida è er Roger Federer, l’actual numer 3 dal mund.

Sis giadas ha Roger Federer gia triumfà als ATP Finals, la davosa giada il 2011. Otg onns suenter ses davos triumf vala il maestro dentant anc adina sco in dals gronds favurits davos il Serb Novak Djokovic che vul medemamain triumfar per la 6avla giada ed uschia egualisar il record da Roger Federer.

Tut è pussibel

Roger Federer frunta en ses emprim gieu da gruppa questa saira a las 21:00 uras sin Dominic Thiem. Avant in onn aveva Federer battì l’Austriac a Londra senza discussiun cun 6:2 e 6:3. En questa stagiun ha Thiem dentant gudagnà omadus duels cun Federer. Tranter auter ha Thiem battì Roger Federer en il final dad Indian Wells en trais sets. Il gieu encunter l’Austriac, il numer 5 dal mund, pudess gia esser il gieu decisiv per sa qualifitgar per il mezfinal. Il favurit da la gruppa cun Federer è Novak Djokovic. Il quart giugader en questa gruppa è il Talian Matteo Berrettini, il numer 8 dal mund.

Co statti cun Nadal?

En l’autra gruppa è Rafael Nadal il favurit. Il Spagnol ha dacurt dentant stuì dar si al turnier da tennis a Paris-Bercy. Plinavant n’ha Nadal anc mai triumfà als ATP Finals. Ses adversaris da gruppa èn il Tudestg Alexander Zverev, il defensur dal titel, lura il Russ Daniil Medwedew ed il Grec Stefanos Tsitsipas.

RR sportissimo 12:00