La Norvegia è e resta la naziun numer 1 da passlung. Al campiunadi mundial a Falun ha la Norvegia gudagnà per l’otgavla giada en seria la staffetta dals umens da 4 giadas 10 kilometers. En il sprint final ha Petter Northug battì il Svedais Calle Halfvarsson per 0,6 secundas. Terzs èn, sco gia als gieus olimpics a Sotschi, ils Franzos.
Terz titel per Northug a Falun
Ina gia dapli ha Petter Northug segirà cun sias qualitads da sprint aur a la Norvegia. Per Northug èsi gia il terz titel da campiun mundial a Falun e ses 12avel en total. La Svizra è vegnida 5avla. Ueli Schnider ha pers bler temp sin l’emprim tschancun ed ha surdà sco 12avel. Lura ha Dario Cologna manà la Svizra enavant ed ha surdà a Jonas Baumann sco sisavel. Sin il davos tschancun ha lura Toni Livers manà la Svizra anc sin il 5avel plaz.
Per Toni Livers è il campiunadi mundial uss a fin. Dario Cologna e Jonas Baumann partan anc dumengia als 50 kilometers classic.
RR novitads 16:00