Siglir tar il cuntegn

Header

cuntegn

Naziunal/Internaziunal Aur per Semerenko e Fak en la disciplina roiala

Al campiunadi mundial da biatlon a Kontiolahti en Finlanda ha l'Ucranaisa Walj Semerenko gudagnà la medaglia dad aur en la cursa sur 12,5 kilometers cun start da massa.

Segirà il titel ha ella surtut cun la ferma prestaziun en il stan da sajettar. La giuvna da 29 onns n’ha sajettà betg ina giada dasperas. Las medaglias d'argient e bronz van a la Tudestga Franziska Preuss ed a la Taliana Karin Oberhofer.

Nagina medaglia hai dà per la traidubla campiunessa olimpica da Sotschi, Daria Domratschewa da la Bielorussia. Ella è vegnida quarta.

Rang 25 per Elisa Gasparin

Elisa Gasparin è vegnida da far bun in pau sia plitost modesta prestaziun en la staffetta. Quai schegea che la cursa ha cumenzà mal. Tar l’emprim sajettar ha ella gist gì 3 sajets fallid. Suenter è ella dentant currida ina buna cursa ed ha mo pli sajettà ina giada dasperas. Uschia hai tanschì a la fin per rang 25.

Jakov Fak gudogna sur 15 km

Ils umens èn currids ina cursa sur 15 kilometers. Ed il nov campiun mundial è Jakov Fak da la Slovenia. La medaglia d'argient va al Tschec Ondrej Moravec e bronz al Norvegias Tarjej Boe. Il sulet Svizzer a la partenza, Benjamin Weger, è vegnì 29avel ed uschia segund davos.

RR sportissimo 17:00

Artitgels legids il pli savens