Bacsinszky fa curtas cun Niculescu

Timea Bacsinszky è en la terza runda a Wimbledon. Avant il resultat cler da 4:6, 6:2 e 6:1 cunter la Rumena Monica Niculescu aveva quai dà ina vair’odissea.

Timea Bacsinszky. Bild in Lightbox öffnen.

Legenda da maletgs: Ha cuntanschì la terza runda da Wimbledon Timea Bacsinszky. Keystone

Il venderdi era Timea Bacsinszky per in’ulteriura giada stada quella ch’aveva stuì patir il pli fitg da la constanta plievgia englaisa. Sia segunda runda cunter Monica Niculescu aveva la giuvna da Losanna pudì cumenzar cun retard – sco gia il gieu da l’entschatta. Gia suenter quatter games era la partida vegnida interrutta per dapli ch’in’ura.

Cura che la plievgia aveva lura puspè cumenzà curt avant las 20:00 han las giugadras definitivamain bandunà il court. En quest mument aveva la Rumena be gudagnà l’emprim set, Bacsinszky il segund. Il set decisiv, en il qual ellas ha pudì giugar be in game, era vegnì stuschà sin la sonda.

Bacsinszky sto be star enavos curt

En quest set ha Bacsinszky demussà a moda impressiunanta, quant bain ch’ella ha magunà las spustadas ed interrupziuns pervi da l’aura dals ultims dis. Il numer 11 n’ha laschà nagins games pli a si’adversaria ed ha finì la cuntinuaziun dal venderdi suenter be 25 minutas.

En la proxima runda frunta Bacsinszky sin la Russa Anastasia Pawljutschenkowa (24), il numer 23 dal mund.

RR novitads 14:00