Siglir tar il cuntegn
cuntegn

Naziunal/Internaziunal Bacsinszky fa smirvegliar en la China

Cun la victoria en dus sets cunter il numer 11 dal mund Aryna Sabalenka, vegn Timea Bacsinszky en il mezfinal al turnier WTA a Tianjin.

La giugadra da tennis Timea Bacsinszky.
Legenda: Timea Bacsinszky durant ina partida da l'US Open l'avust passà. (archiv) Keystone

La victoria a Tianjin è per Timea Bacsinszky la pli custaivla da la turnea da WTA dapi pli ch'in onn. La Svizra da 29 onns ha gudagnà il quartfinal cunter Aryna Sabalenka da la Bielorussia cun 7:6 (7:2), 7:6 (7:5).

Era sche Bacsinszky è vegnida en omadus sets baud en retard, ha ella la finala victorisà suenter duas uras e 16 minutas. Aryna Sabalenka ch'è nov onns pli giuvna ed ina da las stailas da quest onn, cumbatta sco numer 11 dal mund anc per sa qualifitgar per ils Masters.

In success ditg bramà

La davosa giada che Timea Bacsinszky è stada en in mezfinal d'in turnier WTA, è stà il 2017 al French Open. Lura aveva ella medememain battì il numer 11 dal mund en il quartfinal, e quai n'era stà nagin auter che Venus Williams.

I suonda ina dir nusch

Suenter in'operaziun vid la chanvella n'ha Timea Bacsinszky betg pudì repeter ses success dals davos onns. Actualmain è ella anc sin plazza 329 da la rangaziun mundiala. Dentant ussa frunta ella la sonda en il mezfinal sin Karolina Pliskova da la Tschechia, il numer 1 dal turnier.

RR novitads 11:00