Timea Bacsinszky cuntanscha il mezfinal al French Open. La Vadaisa (WTA 24) ha gudagnà cunter la Beltga Alison van Uytvanck (WTA93) cun 6:4 e 7:5. Uschia è ella l’emprima Svizra dapi Martina Hingis il 2001 che cuntanscha puspè in mezfinal a Paris.
Bacsinszky suverana
Timea Bacsinszky ha cumenzà bain la partida ed ha gudagnà senza gronds problems l’emprim set. En il segund set ha la Beltga pudì augmentar sia prestaziun, uschia che la partida è vegnida pli gulivada. Il break decisiv ha la Svizra fatg curt avant la fin al 6:5 ed ha uschia pudì gudagnar suveran il quartfinal en dus sets.
En il mezfinal da damaun frunta Timea Bacsinszky sin il numer in dal mund, Serena Williams. La Svizra fa dentant gia ussa in sigl en la rangaziun mundiala da la posiziun 24 sin 15.
RR novitads 17:00