La squadra naziunala da ballape U21 è sa qualifitgada per la runda finala dal campiunadi europeic 2021. L'ultim pass n'è betg stà grev: A Bienna ha la Svizra gudagnà cunter Liechtenstein cun 3:0.
L'emprim gol ha Jérémy Guillemenot fatg cun ina ballachau. Curt avant la pausa ha Andi Zeqiri pudì dar la balla en il gol, quai suenter ina flanca da Dan Ndoye. Il sajet da Silvan Sidler sut la latta, curt suenter che la segunda mesadad ha cumenzà, è stà la fin d'ina partida betg eguala.
Ils gieus da gruppa en quatter gruppas cun mintgamai quatter squadras èn la fin mars. Ils quartfinals, mezfinals ed il final vegnan giugads la stad, gist avant la runda finala dal campiunadi europeic cun las naziunalas A.
Campiunadi europeic 2019 vs. 2021
Questa giada po la squadra naziunala da ballape U21 festivar ina victoria suenter l'autra. Suenter otg gieus ha la squadra dal trenader Mauro Lustrinelli il maximum da puncts sin lur conto. – Tut auter è quai stà il 2019: L'ultima generaziun aveva stuì sa cuntentar en la qualificaziun cun il segund davos plaz en lur gruppa. Duas da trais victorias avevan ils Svizzers fatg cunter Liechtenstein. L'ultima giada che la Svizra è stà en la runda finala dal campiunadi europeic U21 è stà l'onn 2011 cun la generaziun enturn Yann Sommer, Granit Xhaka e Xherdan Shaqiri.
