Il club da ballape turitgais FCZ sa separa da ses trenader Ludovic Magnin. Ils Turitgais èn suenter trais gieus cun be in punct a la cua da la tabella da la Super League.
La relaschada da Magnin n'è nagina surpresa. Guardà sur la stagiun actuala enavos, ha la squadra giugà 12 gieus en seria senza ina victoria. La terrada da 0:4 da l'ultima sonda ordaifer cunter la squadra promovida da Losanna, ha sfurzà il president, Ancillo Canepa, dad Agir. Ad interim surpiglia Massimo Rizzo da trenar il FCZ.
Magnin ha surpiglià il 2018 da trenar il FCZ, quai suenter che Uli Forte era vegnì relaschà. Il matg da quel onn ha el lura manà la squadra a la victoria da la Cuppa Svizra. En la stagiun suenter ha il FCZ en la campagna da l'Europa League tranter auter battì il FC Bayern Leverkusen ed è sa qualifitgà per la fasa da k.o..